Għid lil ħbiebek dwar Spazju Sagru

Jekk inti sibt Spazju Sagru ta' għajnuna, għaliex ma tgħidx bih lin-nies li taf?  Tista' tibgħat e-mail issa stess lil ħbiebek, dment li inti fuq l-Internet.

Biex jiffrankalek ix-xogħol, hawn taħt għandek issib paragrafu li fih it-tagħrif meħtieġ.  Tista' żżid miegħu il-kummenti tiegħek ukoll. Biex tużah, bil-maws, immarka bil-highlighter, agħfas CTRL u C f'daqqa biex tikkopjah.  Iftaħ il-programm tiegħek ta' l-e-mail, u waħħlu (paste it) ma' kull messaġġ billi tagħfas CTRL u V f'daqqa.

"Sibt web site ġdid, li jismu Spazju Sagru www.maltajesuitretreats.com/spazjusagru 

Dan jiggwidak f'sessjoni ta' talb li ddum minn 5 sa 10 minuti.  Fih 6 passi jew sezzjonijiet.  Jibda b'"Tidħol fil-Preżenza t'Alla" u ssib eżerċizzi li jħejjuk għat-talb.  Il-qofol tiegħu huwa silta qasira mill-Iskrittura magħżula għal dak il-jum (għalhekk għandek issib waħda differenti kuljum).  Il-Ġiżwiti Irlandiżi ħolqu dan is-sit ħalli jgħinu lil min iħobb juża l-kompjuter biex jidra jitlob kuljum.  Għandhom 'il fuq minn miljun viżitatur!  Inti rajtu? 

Nota: Spazju Sagru hija traduzjoni aġġornata tal-versjoni bl-Ingliż li nbdiet mill Ġizwiti ta’ l-Irlanda u li għada popolari ħafna ma miljuni ta’ nies mad-dinja kollha."

 

Minn dak li nisimgħu jidher ċar li s'issa:

  1. It-talb jagħmel differenza f'ħajjitna,  u Sacred  Space qed jagħmel verament differenza fil-ħajja ta' ħafna nies.  Għalhekk jista' jkun li inti tkun qed tagħmel pjaċir lil xi ħadd billi tgħarrfu bih. Nittamaw li l-verżjoni bil-Malti www.maltajesuitretreats.com/spazjusagru tkun daqstant utili.

  2. Mhux il-Kattolċi impenjati biss qed isibuh ta' għajnuna.  Hemm ukoll nies li mhumiex Kattoliċi.  Għalhekk tgħidx bih biss lil min imur il-knisja.

Erġa' lura



































Eżerċizzju Fiżiku       (adattat minn 'God of Surprises' ta' Gerry W. Hughes SJ)

Oqgħod bilqiegħda fuq siġġu.  Oqgħod bilqiegħda dritt iżda f'pożizzjoni komda.  Dahrek jistrieħ ma' dahar is-siġġu.  Ħalli lil ġismek jirrilassja mingħajr ma tintelaq iżżejjed, saqajk ma' l-art quddiemek u jdejk mistriħin fuq koxxtejk jew flimkien f'ħoġrok.

Agħlaq għajnejk, inkella sammarhom fuq xi mkien quddiemek.  Issa ħalli l-attenzjoni tiegħek kollha tistrieħ fuq dak li tkun qed tħoss f'ġismek.  Tista' tibda dan l-eżerċizzju minn riġlejk 'il fuq, filwaqt li iżżomm l-attenzjoni tiegħek, imqar għal ftit sekondi biss, fuq dik il-parti ta' ġismek fejn tkun qed tħoss xi ħaġa.  Biss, iktar ma jirnexxilek tieqaf fuq xi parti, aħjar.  L-attenzjoni tiegħek trid tmur fuq dak li tkun qed tħoss, mhux fuq il-ħsibijiet tiegħek fuq dak li qed tħoss.  Jekk m'intix komdu, inkellu jibda jieklok xi mkien, aċċetta dak in-nuqqas ta' kumdita', għid lilek innifsek li kollox sew, u mingħajr ma tiċċaqlaq, issokta ffoka l-attenzjoni tiegħek fuq dak li qed tħoss f'ġismeky.

Moħħna rari jħallina bi kwietna biex nagħmlu eżerċizzju bħal dan.  Jibda jiġbed l-attenzjoni tagħna b'mistoqsijiet bħal: Qed taħli ħin prezzjuż.  Dan x'għandu x'jaqsam mat-talb?  Din xi ħaġa tal-Ħindus?  X'jiswa dan kollu?  Meta jiġuk dawn il-mistoqsijiet, agħmel bħalma għamilt meta beda jieklok xi mkien: aċċettahom u mbagħad erġa' kkonċentra fuq dak li tkun qed tħoss f'ġismek.

Jekk trid, tista' tmur għal talb iktar espli`itu billi toqgħod tirrepeti lilek innifsek dawn il-kliem ta' S. Pawl: Fih ngħix, u niċċaqlaq, u jien dak li jien.

Erġa' lura għal Il-Preżenza ta' Alla





































Eżerċizzju biex tieħu n-nifs       (adattat minn 'God of Surprises' ta' Gerry W Hughes SJ)

F'dan l-eżerċizzju inti sejjer titfa' l-attenzjoni tiegħek kollha fuq dak li tkun qed tħoss fiżikament waqt li tkun qed tieħu n-nifs 'il ġewwa u 'l barra.  Tipprovax tbiddel ir-ritmu li bih tkun qed tieħu n-nifs.

Itfa' l-attenzjoni tiegħek kollha fuq dak li qed tħoss: l-arja kiesħa inti u tieħu n-nifs 'il ġewwa u l-arja sħuna inti u tieħu n-nifs 'l barra.  Għall-ewwel jista' jiġri li inti ssir konxju żżejjed tan-nifs li tkun qed tieħu u hekk in-nifs isir irregulari.  Biss, ġeneralment, dan ma tantx idum.  Jekk in-nifs jibqa' irregolari u tibda taqta' nifsek, dan l-eżerċizzju mhux għalik bħalissa.

Ħafna nies isibu li meta jagħmlu dan l-eżerċizzju t-tip ta' nifs li jibdew jieħdu jinbidel.  Jibdew jieħdu n-nifs iktar fil-fond u iktar bil-mod.  Jibdew jitħeddlu u jibda donnu jaqbadhom in-ngħas.  Dan ikun ifisser li jkunu qed jistrieħu u jirrilassjaw.  Iżda jekk trid li dan l-eżerċizzju jsir talba, inti u tieħu n-nifs 'il ġewwa, ipprova li dan in-nifs ifisser dak kollu li tixxennaq għalih fil-ħajja, avolja dak li tixtieq ma jistax iseħħ fil-prattika.  Inti u titfa' n-nifs 'il barra, ipprova intelaq int ma' dak kollu li għandek f'idejn Alla: offrilu ħajtek kollha bl-inkwiet, id-dnubiet, is-sens ta' ħtija u d-dispjaċiri li għandek.

Importanti li matul l-eżerċizzju inti ma tiġġudikax lilek innifsek.  La għandek tapprova u lanqas tiddiżapprova dan kollu.  Itfa' l-attenzjoni tiegħek kollha fuq ix-xewqa li inti terħi dan l-inkwiet kollu f'idejn Alla, u li ma żżommux għalik bħallikieku kienu xi teżor prezzjuż.

Erġa' lura għal Il-Preżenza ta' Alla


































Eżerċizzju biex tisma'       (adattat minn 'Praying in Lent' ta' Donal Neary SJ)


Oqgħod bilqiegħda fuq is-siġġu, f'pożizzjoni wieqfa u komda, b'dahrek jistrieħ mas-siġġu.

Oqgħod attent għall-ħsejjes li tkun qed tisma': il-ħsejjes 'il bogħod.  Ismagħhom biss, tipprovax tara x'inhuma....

Oqgħod issemma' ħsejjes iktar fini u ħfief, imbagħad ħsejjes iktar fil-qrib.  Isma' biss, kun konxju ta' dawn il-ħsejjes....

U t-tektik ta' qalbek, ħoss dgħajjef u bilkemm jinstema', iżda dan hu r-ritmu ta' ħajtek....

U l-ħoss tas-skiet tal-post fejn tkun qed titlob, u s-skiet ġo qalbek....

Oqgħod isma' dan kollu għal ftit minuti.




Erġa' lura għal Il-Preżenza ta' Alla


 
L-Innu Malti (Dun Karm Psaila)

Lil din l-Art ħelwa, l-Omm li tatna isimha,
Ħares Mulej, kif dejjem Int ħarist;
Ftakar li lilha bl-oħla dawl libbist.

Agħti kbir Alla, id-deh'n lil min jaħkimha;
Rodd il-ħniena lis-sid, saħħa 'l-ħaddiem;
Seddaq il-għaqda fil-Maltin u s-sliem.

Erġa' lura għal Il-Preżenza ta' Alla